Kekana sê Tshwane word ’n piesangstad
2010-10-01 07:28
Pretoria - Die Tshwane-metroraad het gister vure doodgeslaan nadat ’n verdoemende brief van Kiba Kekana, sy geskorste munisipale bestuurder, aan die lig gekom het.
Die uitlek van dié brief, wat Kekana glo in Februarie aan dr. Gwen Ramokgopa, uitvoerende burgemeester, gestuur het, is die jongste wending in Kekana se opspraakwekkende skorsing.
Kekana is verlede jaar “voorlopig” geskors nadat Ramokgopa op 29 Oktober ’n memorandum aan die Tshwane-raad voorgelê het.
Kekana beskuldig Ramokgopa in sy brief daarvan dat sy onder politieke druk geswig en hom op aandrang van die ANC se Tshwane-streek laat verwyder het. Volgens hom is dit gedoen sodat hy nie in die pad kan staan nie van “twyfelagtige karakters” (in die ANC), wat glo op onetiese wyse tenders vir eie voordeel wil toeken.
Die R1,2 miljard-kontrak vir die herbou van Munitoria is een van die tenders wat in die brief genoem word.
Hy beweer Ramokgopa, Sputla Ramokgopa, die ANC-voorsitter in die Tshwane-streek en glo ’n familielid van die burgemeester, Kgosi Maepa, ’n strategiese uitvoerende hoof in die burgemeester se kantoor, en Oupa Nkoane, die waarnemende munisipale bestuurder, is kop in een mus.
Sputla Ramokgopa is, volgens Kekana, aan die voorpunt van die heksejag teen hom.
Luidens die brief bestuur die ANC se plaaslike uitvoerende komitee Tshwane en word munisipale hulpbronne vir dié party se politieke aktiwiteite gebruik. Kekana het gemaan dit is ’n resep vir ’n “Banana City”.
Gwen Ramokgopa het gister gesê sy steur haar nie aan skinderstories in die media nie.
Sy kon Beeld nie ’n reguit antwoord gee oor of sy wel die brief gekry het nie.
Volgens Terrance Mashego, ANC-hoofsweep in die Tshwane-raad, is dit berigte soos dié (oor die brief) wat maak dat ’n mediatribunaal nodig is.
Kekana het gistermiddag gesê sy prokureur het hom afgeraai om kommentaar te lewer oor die brief. Dit is onseker wie die brief aan die media gegee het.
Die DA het op gister se raadsvergadering ’n mosie ingedien waarin gevra word dat die Ntsebeza-verslag onmiddellik aan die raad voorgelê moet word.
Adv. Dumisa Ntsebeza SC, is in Februarie aangestel om die bewerings van wanbestuur en ongerymdhede teen Kekana te ondersoek.
Hy het onlangs aangedui die verslag is al in Junie aan Ramokgopa oorhandig. Die verslag word sedertdien met groot geheimhouding gehanteer.
Die DA het ook gevra die raad moenie ’n goue handdruk aan Kekana toestaan voordat die Ntsebeza-verslag in die raad bespreek is nie.
Tshwane oorweeg volgens inligting om nagenoeg R2,5 miljoen aan Kekana uit te betaal in ’n skikkingsooreenkoms.
Die mosie is van die hand gewys.
- Beeld