Keer terug werk toe, sê Zuma aan stakers
2012-10-17 17:54
Pretoria – Pres. Jacob Zuma het Woensdag 'n beroep op stakende werkers gedoen om onmiddellik terug te keer werk toe.
Zuma het ook die hoof- uitvoerende beamptes van maatskappye gevra om hul bonusse en verhogings, te midde van wydverspreide maatskaplike onrus, te vries.
"Ons doen 'n beroep op werkers wat betrokke is by onbeskermde stakings, om so gou as moontlik terug te keer werk toe, en produksie in die mynbedryf om na normaal terug te keer," het Zuma op 'n vergadering met vakbonde en sakeleiers in Pretoria gesê.
"Ons het ooreengestem dat die geweld en intimidasie moet stop. Dit het geen rol in ons stelsel nie, en het eenvoudig net 'n negatiewe impak."
Gewelddadige stakings die afgelope ruk het die land lam gelê toe duisende werkers begin staak het om hoër lone te eis. Altesaam 50 mense het weens die geweld gesterf.
Pravin Gordhan, minister van finansies, Zwelinzima Vavi, hoofsekretaris van Cosatu, en Joseph Mathunjwa, president van die Associated Mining & Construction Union, was onder die beamptes wat die vergadering bygewoon het.
– Volg Nuus24 op Twitter
- AFP
