Kebble se pa 'het geweet'

2010-07-29 14:51

Johannesburg - Brett Kebble was 'n desperate man wat geen ander uitweg gesien het as om sy lewe te beëindig nie, het sy voormalige veiligheidshoof, Clinton Nassif, Donderdag in die Johannesburgse hooggeregshof getuig.

"As hy dit nie gedoen het nie sou hy in 'n gestig of die tronk geland het," het Nassif in Glen Agliotti se verhoor getuig.

Nassif kon nie sy ore glo toe hy van Kebble se plan om te sterf hoor nie.

Hy het Kebble se pa, Roger, gebel en gesê hy moet hom sien want dit was malligheid.

Kebble snr. het eers "uitgefreak" en toe gesê sy seun maak al sedert sy jong dae sulke dreigemente wanneer dinge rof geraak het, het Nassif getuig.

Brett Kebble was woedend vir Nassif omdat hy Kebble se pa ingelig het.

Nassif het ook getuig dat Kebble hom oortuig het dat die plan die enigste uitweg was en dat hy baie dankbaar was dat hulle hom "gehelp" het. - Sapa
 

- Beeld