Kebble-moordwapen is in stukkies gesny
2010-07-28 19:52
Johannesburg - Die vuurwapen wat gebruik is om die mynmagnaat Brett Kebble te vermoor, is opgesny en langs 'n pad in Johannesburg gestrooi, het die hooggeregshof in Johannesburg Woensdag gehoor.
Die staat se vierde getuie en 'n medepligtige in die moord, Faizel Smith, ook bekend as Klippie, het gesê hy het van die wapen ontslae geraak ná Kebble op 27 September 2005 in Melrose doodgeskiet is.
"Ek het stukkies van die vuurwapen saam met my geneem... Ek het stukkies langs die pad gestrooi terwyl het huis toe gery het," het Smith, ook 'n art. 204-getuie in die dwelmhandelaar Glenn Agliotti se saak, gesê.
Hy het gesê hy het die geweerloop en magasyn van die vuurwapen in die Kliprivier, suid van Johannesburg, gegooi.
Smith, soos sy medepligtiges, die bokser Mikey Schultz en Nigel McGurk, het die Kebble-skietery aan die hof verduidelik.
Hy het aan die hof gesê al sy "instruksies" vir die skietery het van Schultz gekom.
Smith het sy verhouding met Schultz en McGurk as 'n hegte een beskryf.
"Ons is beste vriende, soos broers," het hy gesê.
Gedurende Smith se kruisverhoor, het adv. Laurence Hodes, Agliotti se regsverteenwoordiger, vasgestel dat Agliotti nie met hom saamgesweer het, "betrokke" was of Kebble se dood "veroorsaak" het nie.
Smith het gesê Agliotti het nooit met hom saamgesweer of betaal vir die skietery nie.
Ná sy vlugtige getuienes, het Smith die getuiebank verlaat.
Regter Frans Kgomo het gesê Smith sal ná die verhoor weet of hy vrywaring van vervolging kry.
Volgens art. 204 van die Strafproseswet kan 'n getuie vrywaring van vervolging kry as hy vir die staat getuig en sy getuienes as eerlik geag word.
Volg Nuus24 op Twitter
- SAPA