Agliotti pleit onskuld
2010-07-26 10:33
Johannesburg – Die moordsaak van die mynmagnaat Brett Kebble het Maandag in die hooggeregshof in Johannesburg afgeskop. Dit is byna vyf jaar sedert Kebble vermoor is.
Glen Agliotti staan tereg op die moord op Kebble. Agliotti was die staat se hoofgetuie in die saak teen die voormalige nasionale polisiehoof, Jackie Selebi.
Volgens verslaggewers wat vanuit die hof tweet, het Agliottti onskuldig gepleit op die moordklag.
Die verhoor skop nou eers af omdat die staat eers Selebi se verhoor wou afhandel. Selebi is skuldig bevind van korrupsie.
Maandag se verhoor is ook onder ‘n nuwe staatsaanklaer, adv. Daniel Dakana aangevoer, nadat die voormalige aanklaer, Gerrie Nel, van die saak verwyder is.
Mthunzi Mhaga, woordvoerder vir die nasionale vervolgingsgesag (NVG), kon nie Maandagoggend gerugte bevestig dat verdere klagtes teen Agliotti gemaak is nie.
Die radiostasie Talk Radio 702 het berig dat Agliotti ook aangekla sal word van sameswering omdat hy daarvan verdink word dat hy van Kebble se mededingers in die sake-wêreld vermoor het. Daar is ook berig dat ‘n klag van poging tot moord teen Agliotti ondersoek word nadat Stephen Mildenhall geskiet is.
Kebble is in sy voertuig in Melrose, Johannesburg, op 27 September 2005 doodgeskiet. Agliotti het na sy inhegtenisname gesê Kebble se dood was selfmoord.
Volg Nuus24 op Twitter.