Kastrasie uitgesluit as straf – minister

2013-02-27 17:58

Pretoria – Lulu Xingwana, minister van vroue, kinders en mense met gestremdhede, het chemiese kastrasie uitgesluit as straf vir mans wat skuldig bevind word op aanklag van verkragting, berig Eyewitness News.

Xingwana, wat op 'n mediakonferensie oor geweld in Pretoria gepraat het, het menseregte-kwessies aangevoer as rede vir dié besluit.

Sy het gesê chemiese kastrasie is weens die land se handves van regte nié 'n opsie nie.

"Vir my om jou met 'n chemiese middel in te spuit, moet jy instem en as jy nie instem nie, sal dit 'n misdaad wees."

In onlangse weke was daar toenemende oproepe op die regering om meer te doen om verkragting en seksuele geweld in die land te verhoed.

Xingwana is egter nie daarvan oortuig dat chemiese kastrasie 'n effektiewe afskrikmiddel sal wees nie.

– Volg Nuus24 op Twitter