Karoo kry meeste sneeu in 30 jr
2011-07-26 19:53
Kaapstad – Die sneeu wat die afgelope week in die Karoo by Beaufort-Wes geval het, is die meeste sneeu sedert 1981, berig Landbouweekblad.
Mnr. Hein Rust, hoof van die rampbestuursentrum van die sentrale Karoo-munisipaliteit naby Beaufort-Wes, sê dié dele kry gewoonlik elke jaar sneeu, maar net in die hoogliggende dele soos op die Nuweveldberge.
“Hierdie sneeu was die meeste sedert 1981 wat so laag geval het soos in die dorp self,” aldus Rust.
Rust sê dit het Sondagnag en Maandagoggend (24 en 25 Julie 2011) begin sneeu en reën in die distrik. Die sneeu het sowat 40 km suid en suid-oos van Beaufort-Wes begin, en ál meer noord na Drie Susters, Richmond en Victoria-Wes uitgebrei.
Gamka-dam
Rust sê sowat 40 mm reën het in die omgewing geval, waarvoor hulle baie dankbaar is. Die Gamka-dam, wat die gebied van water voorsien, is tans 43% vol. Hy sê hulle verwag dat die dam se watervlak sal styg wanneer die sneeu smelt.
Beaufort-Wes het verlede jaar tydens die Kerstyd reisigers wat daardeur gery het op pad na vakansie gevra om vyf liter-bottels water aan die dorp te skenk omdat hulle groot waternood ervaar het.
Roetes gesluit
Volgens Rust moes die N1 tussen Beaufort-Wes en Drie Susters Maandag in ’n stadium gesluit word omdat die pad baie glad was weens die sneeu. Hy sê twee ongelukke het voorgekom, maar dit was nie ernstig nie.
Intussen sê Agri Oos-Kaap sowat 18 paaie is in die provinsie toegesneeu. ’n Groot deel van die afgevaardigdes wat dié week die organisasie se jaarlikse kongres sou bywoon, sal nie daar kan uitkom nie. Die organisasie sê ’n groot klomp boere van die distrikte Oueenstown, Barkley-Oos en Jamestown is tans op hul plase vasgekeer.
- Landbouweekblad