Karkasse van 20 renosters opgegrawe
2010-10-09 06:41
Johannesburg - Nog twee vermeende lede van die sogenaamde Groenewald-stroperbende het vandeesweek in die hof in Musina verskyn.
Mnre. Gys du Preez (31), ’n beroepsjagter, en Joseph Maluleka (39), ’n plaaswerker, moet nou van 11 April saam met die ander 11 beskuldigdes teregstaan op aanklagte van onder meer die onwettige besit van renosterhoring.
Albei is op borgtog vrygelaat, het lt.kol. Musa Zondi, woordvoerder van die Valke, gister gesê.
Intussen is 20 renosterkarkasse op Dawie Groenewald se plaas Prachtig in die Musina-omgewing opgegrawe.
Hy en tien ander mense, onder wie twee veeartse en ’n helikoptervlieënier, het ook onlangs in die hof verskyn weens bewerings dat hulle deel van ’n sindikaat is wat renosters in die omgewings van Polokwane, Modimolle (Nylstroom) en Musina gestroop en hul horings verkoop het.
Faan Coetzee van die Trust vir Bedreigde Wildlewe het gistermiddag in reaksie op die jongste inhegtenisnemings gesê die polisie werk “ongelooflik hard aan die saak en daar gaan ongetwyfeld nog ’n paar verrassings kom.
“Dit is al bekend dat hulle gesê het dat nog lasbriewe vir inhegtenisneming uitgereik is en nog net op die verdagtes bestel moet word”.
Volgens Coetzee wil dit voorkom asof stropers nou ’n bietjie oor die saak “dink” voordat hulle toeslaan.
Hy verwag met die druk wat nou op stropers geplaas word, gaan nog “rotte binnekort uit die krake spring”.
Tot dusver vanjaar is 228 renosters in Suid-Afrika gestroop. Woensdag is die jongste slagoffer op ’n wildplaas naby Khula net buite Mtubatuba in die noorde van KwaZulu-Natal gevind.
Verlede jaar is 122 renosters onwettig geskiet.
Maandag begin die verhoor van mnre. Gert Saaiman van Saaiman Hunting Safaris en George Fletcher van Sandhurst Safari’s en sewe ander beskuldigdes in die hooggeregshof in Pretoria.
Hulle word van ’n string oortredings aangekla, waaronder die onwettige jag van renosters, onwettige handel in renosterhoring, geldwassery en diefstal. Ná die inheg- tenisneming van die groep vroeër vanjaar is op bates van sowat R40miljoen beslag gelê.
- Die Burger