Nee vir kondome in Katolieke skole

2013-02-24 11:30

Johannesburg – Geen kondome sal versprei word by skole wat op die Katolieke kerk se grond gebou is nie, het die Sunday Times berig.

Kardinaal Wilfred Napier, Suid-Afrika se hoogste Rooms-Katolieke ampsdraer, het die plan deur die departement van onderwys in KwaZulu-Natal as "kortsigtig" en "immoreel" bestempel.

Napier het sy ontevredenheid oor die departement se planne in 'n brief aan Senzo Mchunu, LUR vir onderwys, te kenne gegee.

Mchunu het die besluit geneem ná 'n konferensie verlede maand om oplossings te vind vir seksuele mishandeling, tienerswangerskap en dwelmmisbruik in die provinsie.

"Sodra iets deur mense is gesagsposisies versprei word, dink kinders dit is reg. Ek kan nie die gebrek aan insig verstaan na die sielkundige skade wat ons jonger generasie aangerig word nie," het Napier aan die koerant gesê.

Volgens die koerant het Mchunu bevestig dat kondome nie in Katolieke skole versprei sal word nie.

– Volg Nuus24 op Twitter

- SAPA