Kapers hou hul voor as metropolisie
2010-05-19 06:42
Virginia Keppler, Beeld
’n Oos-Randse pa het Dinsdag huilend vertel hoe drie gewapende mans in Johannesburgse metropolisie-uniforms sy motor gekaap, sy hande agter sy rug geboei en ’n swart plastieksak oor sy kop en gesig vasgebind het.
Frikkie Davel (29) van Edenvale het gesê hy was om 17:00 in sy maroen Mazda Midge op pad huis toe, toe die kapers hom in Henleystraat in Brixton van die pad getrek het.
“Hulle het voor my stilgehou en die bestuurder en passasier het uitgeklim en na my toe gestap. ’n Derde persoon het agter in die motor (’n wit Toyota Corolla) bly sit.”
Die kapers het sy rybewys gevra, hom beveel om uit die voertuig te klim, deurgesoek en sy selfoon gevat.
“Hulle het gesê hulle arresteer my vir roekelose bestuur en toe boei hulle my hande agter my rug.
“Ek het gevra wat ek verkeerd gedoen het en hulle het gesê: ‘Ons sal later daaroor praat’,” het Davel vertel.
Die kapers het Davel agter in hul motor gedruk, ’n swart plastieksak om sy kop getrek en agter sy nek met ’n tou vasgebind.
Die sak was gelukkig nie styf vasgebind nie en Davel kon nog asemhaal. Hulle het toe verskeie draaie met hom gery terwyl hy met sy kop op een van die kapers se skoot gelê het.
“Ek het besef ek word gekaap en dat ek kalm moet bly.”
Ná ’n ruk het die kapers iewers in die bos stilgehou, Davel uit hul motor gepluk en hom dieper in die bos ingelei.
“Hulle het gesê ek moet gaan lê en toe dog ek dit is verby. Ek gaan nooit weer my baba (Xander, agt maande) en my vrou (Ronelle, 25) sien nie,” het Davel huilend vertel.
Die kapers het daarna die boeie van sy hande afgehaal, gesê hy moet stil bly lê en toe weggestap.
“Ná sowat tien minute het ek die sak oopgeskeur en uit die bos na die pad gehardloop.”
Hy het gehardloop tot by ’n vulstasie waar hy hulp gevra het, maar die kassier het hom weggejaag en gesê hy is dronk.
Hy was toe in Victory Park in Johannesburg.
Nadat hy by drie huise probeer aanklop het om hulp, het hy besef hy is ’n entjie weg van die Linden-polisiekantoor en het daarheen begin stap waar hy dadelik gehelp is.
Teen daardie tyd was dit al ná 19:00 en stikdonker.
Ao. Lorraine van Emmerik, polisiewoordvoerder, het gesê die Brixton-polisie ondersoek ’n klag van motorkaping.
-Beeld
Volg Beeld op Twitter.