Kapenaar oorleef Haïti
2010-01-18 11:02
Aldi Achoeman en Jodine Cloete
Kaapstad - “Ek sou in die portaal of stort van ’n hotel – wat vandag nie meer bestaan nie – gewees het.”
Só het Theo Joubert (38) van Durbanville gister gesê nadat hy Saterdag uit Haïti teruggekeer het.
Hy was daar toe ’n verwoestende aardbewing Dinsdag dié land getref het.
Die Haïtiaanse regering raam die dodetal op tussen 50 000 en 100 000 mense.
Joubert vertel hy het omstreeks 16:00 (Haïti-tyd) ná ’n reis van sowat 33 uur in Port-au-Prince geland.
Hy is mede-eienaar van Kineto Mobile, ’n maatskappy wat selfoonbankdienste aan opkomende markte verskaf, en was op ’n sakebesoek.
“My vennoot in Haïti, Jean-Paul Faubert, het my kom oplaai. Ek wou oudergewoonte eers na die hotel gaan om te rus, maar Jean-Paul het gesê ons moet dadelik na ’n vergadering gaan.
“In my gedagtes het ek gedink ek wil eerder hotel toe gaan, maar ek het ingestem om na die vergadering te gaan.”
Hulle was op pad na die vergadering toe die motor skielik na regs “val”. “Dit het gevoel of die band gebars het.” Toe die motor na links “val” en hulle geboue om hulle sien ineenstort, het hulle besef dit is ’n aardbewing.
“Die Here het my beskerm en seker gemaak ek is veilig.”
Die Montana-hotel, waarheen hy sou gegaan het as Faubert nie daarop aangedring het hulle moet dadelik na ’n vergadering gaan nie, is in die aardbewing verwoes.
Toe Joubert en Faubert besef ’n aardbewing tref die stad, is hulle onmiddellik na Faubert se familie. Faubert se vrou en twee kinders is ongedeerd.
Joubert kon aanvanklik nie kontak maak met sy vrou, Michell, wat saam met hul twee kinders, Danielle (2) en Annabelle (1), by die huis was nie.
“Ek het die volgende oggend (Woensdag) stil geword en die Here gevra dat my vrou ’n boodskap moet kry (dat ek veilig is.)
“In dié tien minute het Jean-Paul ’n oproep van my kantoor (in Suid-Afrika) gekry.”
Mev. Joubert was by die kollega wat Faubert gebel en uitgevind het mnr. Joubert is veilig.
Maar talle werkers in ’n fabriek waarin Faubert belange het, is dood. Dié fabriek was een van die geboue wat hulle besoek het om te probeer help.
“ ’n Mens voel magteloos. Oral waar die geboue ineenstort, is dit soliede sement.
“Ons het nie die toerusting gehad om dit op te lig om mense wat dalk daaronder vasgekeer is, te help nie.”
Faubert het gereël dat Joubert die land in ’n private vliegtuig na Miami verlaat.
Intussen het emeritus-aartsbiskop Desmond Tutu gister sy medelye met die slagoffers van die ramp betuig. Hy het die hoop uitgespreek dat “gewone mense” die geleentheid sou kry om tot “ ’n Suid-Afrikaanse Haïti-rampfonds” by te dra.
“Die hoeveelheid steun van mense van oor die wêreld heen is bemoedigend en wys ons universele gees van samehorigheid.”
- Die Burger