Kankerlyer leer boewe 'n les
2009-10-15 09:24
Virginia Keppler
Brits - ’n Kankerlyer van Brits het twee gewapende rowers uit sy huis verjaag voordat sy gewonde seun die derde aanvaller by die deur uitgestamp het.
Die rowers het Sondag om 20:00 op Deon (61) en Derek Louw (33) en Louw sr. se tweejarige kleinseun, Ivan, in hul huis in die Unique Hof-veiligheidskompleks toegeslaan.
“Die voordeur was oop en ons het in die sitkamer gesit toe die drie duiwels instap, ’n wapen op ons rig en ons beveel om plat te lê,” het Louw jr. gesê.
Louw sr., wat drie jaar gelede al gehoor het hy sou weens kolonkanker nog net twee jaar leef, het dadelik gaan lê.
Sy seun het Ivan gegryp en bo-oor hom gaan lê.
Ivan se ma, Mia Louw (25), was in haar kamer. Sy sterk nog aan ná ’n breinoperasie ná ’n beroerte ’n paar jaar gelede. Toe sy die lawaai hoor, het sy ondersoek ingestel. Sy is ook oorval en ’n rower het haar gewurg.
“In ’n stadium het hulle die vuurwapen teen my pa se kop gedruk en dit ook op Ivan gerig,” het Louw jr. gesê.
Louw sr. het gesê ’n rower wou net sy voete met plastiekkabels vasbind toe hy besluit het om iets te doen. “Ek het opgespring en gemaak of ek iets uit my agtersak haal. Ek skreeu toe vir Derek dat ons die rowers moet aanvat en net daar het twee gevlug.
“Die gewapende rower het verbouereerd geraak en ’n skoot op my geskiet, maar gemis,” het Louw sr. gesê.
Louw jr. het gesê toe sy pa opspring, het hy eers gedink sy pa is dalk nie bang om dood te gaan nie omdat hy kanker het.
“Ek het ook opgespring en op die rower met die vuurwapen afgestorm. Hy het my in die bors geskiet, maar ek het hom by die deur uitgestamp en die deur gesluit,” het Louw jr. gesê. Die koeël is by sy bors aan die linkerkant onder sy ribbes in en agter sy blad uit.
Volgens hom het die polisie ’n uur nadat die voorval aangemeld is, by hul huis opgedaag.
Niks is gesteel nie.
- Beeld