Kabinet veroordeel soldate
2009-08-27 11:42
Kaapstad – Die kabinet het die optrede van soldate wat aan ’n gewelddadige optog by die Uniegebou in Pretoria deelgeneem het, veroordeel.
Die ministers van die kabinet het in ’n gesamentlike verklaring gesê die pogings om die “setel van die regering in te val, is hoogs onaanvaarbaar”.
“Die kabinet veroordeel in die sterkste moontlike terme die onwettige en gewelddadige optog deur lede van die Suid-Afrikaanse Nasionale Weermag (SANW).”
“Om ’n hofbevel te verontagsaam, onnodige geweld te veroorsaak, openbare eiendom te beskadig en poog om die setel van die regering in te val is onaavaarbaar, veral van mense wat die verantwoordelikheid het om die grondwet te beskerm.”
Dié verklaring het ook gewaarsku dat die betogers “geen simpatie van die staat moet verwag nie”.
Talle soldate en ’n polisieman is beseer en polisie- en weermagvoertuie beskadig nadat ’n optog deur sowat 3000 soldate gewelddadig geraak het.
Die soldate eis ’n hoër salaris.
Die polisie het rubberkoeëls en traangas gebruik om die oproerige betogers uiteen te jaag toe hulle geweier het om die Uniegebou te verlaat en die polisie uitgetart het nadat hulle ’n versoekskrif met hul griewe ingehandig het.
Hulle het ’n petrolbom in ’n motor gegooi en die ander beskadig.
Twee soldate is in hegtenis geneem.
Lindiwe Sisulu, minister van verdediging, het dié voorval as ’n “anargie” beskryf en gesê dit plaas die nasionale sekerheid in gedrang.
– Sapa