Kaapstadse tiener voor huis doodgeskiet
2013-01-17 11:29
Kaapstad – Die polisie in die Wes-Kaap sê ‘n tiener is vroegoggend in Ottery in die Moederstad doodgeskiet.
“Ek kan bevestig dat die voorval gebeur het, maar verdere besonderhede sal eers later van ons beamptes op die toneel beskikbaar wees,” het kapt. Frederick van Wyk gesê.
Majidie Abrahams, ‘n raadslid van die ANC wat op die toneel was, sê die seun is afgemaai toe hy na bewering brood gaan koop het. Die voorval het voor sy huis naby Lotus High School plaasgevind.
“Sy lyk lê hier op die sypaadjie en die kinders kan nie skool toe gaan nie, omdat hulle bang is,” het hy gesê.
“Dis bende-verwant, met gevegte oor terreine om dwelms te verkoop. Die gemeenskap word deur twee verskillende woonstelblokke verdeel, en die situasie is wisselvallig. Die gemeenskap is steeds rumoerig.”
Abrahams het die ouderdom van die tiener probeer vasstel, maar sê hy was nie ‘n leerling by die hoërskool nie.
Volgens die raadslid hou die bende-geveg vir die laaste agt maande aan.
Hy het ook teen die tekort aan polisie-teenwoordigheid in die gebied uitgevaar.
Volg Nuus24 op Twitter
- SAPA
