Kaapstad kry eersdaags nuwe gebou van 139 m
2011-08-05 09:10
Kaapstad - ’n Wolkekrabber wat die aangesig van die Moederstad gaan verander, word aanstaande Vrydag bekend gestel.
Dié gebou gaan op die stuk skoongemaakte grond op die hoek van Buitengracht en Hans Strijdomlaan opgerig word.
Die oorspronklike planne om hier te bou is vroeg in 2010 eers deur Old Mutual se eiendomsontwikkelaars agterweë gehou.
Volgens die ou bouplanne sou die gebou 150 m hoog gewees het, maar met die nuwe planne word ’n gebou van 139 m hoog beplan.
Onderhandelings het in 2009 botstil gestaan weens die ekonomiese ineenstorting.
Nou het Old Mutual Property en FirstRand Bank uitnodigings uitgestuur vir ’n amptelike sooispit-geleentheid aanstaande Vrydag om die konstruksie van die toringblok Portside, wat as ’n nuwe baken beskryf word, te vier.
Die premier, Helen Zille, is die genooide spreker.
Die nuwe provinsiale hoofkantoor vir die drie onderafdelings van FirstRand Bank – First National Bank, Rand Merchant Bank en WesBank – word in die nuwe gebou gehuisves. Die gebou sal volgens plan in 2013 voltooi word.
Brent Wiltshire van Old Mutual Property het Donderdag gesê hoewel die bouprojek bekend gestel gaan word, moet die stadsraad eers nog veranderings aan die planne goedkeur. Die grond is in 2007 vir R89 miljoen van die stadsraad gekoop.
Voorheen sou die wolkekrabber uit ’n hotel, kantoorsentrum en plek vir handelsbedrywighede bestaan, maar die hotelgedeelte is intussen laat vaar.
Die gebou gaan blykbaar ’n bushalte van die MyCiTi-busdiens huisves.
Volg Nuus24 op Twitter.
- Die Burger