‘Kaapstad in apartheid vasgevang’
2011-04-27 08:08
Johannesburg - ANC-ondersteuners moet hul stemme nie weggooi deur nie ’n kruisie op 18 Mei te trek nie, het pres. Jacob Zuma Dinsdag gesê.
“Moenie jul stem weggooi nie – laat dit praat. ’n Stem vir enige ander party is ’n ‘stil stem’.
“Mense wat hulself liefhet, sal vir die ANC stem,” het hy tydens die ANC se verkiesingsveldtog in Soweto gesê.
Dit kom te midde van bespiegelings dat baie mense wat voorheen vir die ANC gestem het, op 18 Mei hul ontevredenheid met die gehalte van dienslewering te kenne gaan gee deur nie te stem nie.
Volgens die ANC-leier is Kaapstad steeds in apartheid vasgevang. Die Kaapstad van gister is die Kaapstad van vandag, het hy gesê.
“Die tyd het gekom,” het hy in Afrikaans gesê en in Zoeloe vervolg, “dat Kaapstad verander.”
Hy het ’n krans by die Hector Pieterson-gedenkteken gelê voordat hy honderde ondersteuners in Zoeloe toegespreek het.
Zuma het sy kenmerkende “Awuleth’ Umshini wami” (bring my masjiengeweer) tot groot vermaak van sy ondersteuners gesing.
Hy en sy gevolg, onder wie Winnie Madikizela-Mandela, is daarna na die huis in Vilakazistraat waar sy saam met oudpres. Nelson Mandela gewoon het. Zuma het in die besoekersboek geskryf: “Dit voel goed om weer hier te wees.”
Daarna het hy ’n plakkaat voor die huis opgesit en grappenderwys aan fotograwe gesê hul mag slegs foto’s neem as hulle vir die ANC gaan stem.
Die president het ook die Dube-hostel en Jabulani Mall besoek waar hy inwoners toegespreek het.
Daarna is hy na die Maponya Mall waar Richard Maponya, die ontwikkelaar van die winkelsentrum, hom en sy gevolg onthaal het.
Sekondes voordat Zuma by die winkelsentrum ingegaan het, was daar ’n wolkbreuk. Sy ondersteuners het dit as ’n seën beskryf.
Hoewel honderde mense gretig op Zuma gewag het en die ANC se Harley Davidson-brigade hul motorfietse laat brul het, het die meeste mense in die sentrum ongestoord met hul inkopies voortgegaan.
Cedric Namakondo, ’n veiligheidswag by die sentrum, was nie juis beïndruk nie.
“Ek weet nie vir wie om te stem nie. Ek wag al jare vir my Hop-huis, maar elke keer as ek bel, sê hulle ek moet geduldig wees.”
Namakondo, wat in Chiawelo woon, het gesê straatligte is onlangs daar aangebring, maar hy vermoed dit is net om mense vir die ANC te laat stem.
“Dit sal seker binne twee weke ophou werk.”
Volg Nuus24 op Twitter.