Kaapstad gons voor staatsrede
2011-02-10 16:00
Kaapstad – Verskeie Kapenaars is gretig om te hoor wat president Jacob Zuma Donderdagaand tydens sy derde staatsrede sal sê.
“Ja, ek sal verseker na die uitsending kyk. Dit is interessant om te hoor waarna ons kan uitsien vir die res van die jaar,” het Riyaaz Hendriks (30), ‘n verkoopsklerk by ‘n meubelwinkel oorkant die parlement, gesê.
Hendriks sien glo daarna uit dat die president ‘n “volledige plan van aksie” bekend sal stel om positiewe veranderinge in Suid-Afrika se onderwys- en gesondheidstelsel te laat plaasvind.
President Zuma sal ook moontlik tydens sy staatsrede aankondig wanneer die plaaslike regeringverkiesing vanjaar gaan plaasvind.
Die gebied in en om die Parlement in Kaapstad is 'n miernes van bedrywighede ter voorbereiding van die verrigtinge.
Verskeie paaie - insluitend Hertzog Boulevard en Adderley- en Strandstrate sal om vyfuur vanmiddag gesluit word.
Volg MyNuus24 op Twitter om op hoogte te bly van president Jacob Zuma se derde staatsrede.