Kaapse universiteit gee prof die trekpas
2010-02-04 11:01
Marelize Potgieter
Kaapstad - Maande ná geweld oor klasgelde op die kampus van die Kaapse Skiereiland Universiteit van Tegnologie (KSUT) uitgebreek het, is die instelling weer in die kollig.
Die voormalige dekaan van die fakulteit besigheidstudie by KSUT, prof. Mohamed Saheed Bayat, is op drie aanklagte van ernstige akademiese en administratiewe onreëlmatighede skuldig bevind en van Maandag ontslaan.
Nog drie senior personeellede van die universiteit sal na aanleiding van die verhoor ondersoek word.
Volgens regter Siraj Desai, die waarnemende voorsitter van die raad van KSUT, word hulle verbind met die onreëlmatighede waarvoor Bayat ondersoek is.
’n Ondersoek is in September begin toe Bayat se bedenklike optrede deur die destydse registrateur van KSUT, Alwyn van Gensen, onder die raad se aandag gebring is.
Die ondersoek is deur ’n onafhanklike bemiddelaar, Sarah Christie, gelei en ’n diepgaande verslag is oor die ondersoeke uitgereik.
Bayat is ná ’n verhoor wat etlike dae geduur het, skuldig bevind.
Volgens Desai is bevind dat Bayat die prosedure vir die aanstelling van ’n eksterne eksaminator vir die nasien van ’n verhandeling van ’n meestersgraad-student beïnvloed het.
Dié student was ook ’n konsul-generaal van ’n missie in die Midde-Ooste. Hy het bespiegeling dat dié eksaminator ’n familielid van Bayat is, as onwaar afgemaak.
“Hy is ook daaraan skuldig bevind dat hy finansiële gewin geput het uit ’n ooreenkoms met ’n maatskappy wat studente aangestel het om verkope te doen. Dié werk is as deel van die studente se kursus beskou.”
Die bedrag ter sprake beloop duisende rande.
Laastens het die ondersoek bevestig dat Bayat sy perke as hoof van die fakulteit oorskry het deur ’n student se punte aan te pas.
Hy is onskuldig bevind op ’n aanklag dat hy onregmatig opgetree het deur vir sy vrou ’n aanstelling te help kry by die universiteit se hotelskool.
Bayat beoog om teen die bevindings te appelleer omdat dit volgens hom op feitelike onakkuraathede gegrond is.
“Ek vind dit veral kommerwekkend dat die universiteit se drie sleutelgetuies, mnre. Daan de Goede, Pieter de Jager en prof. André Slabbert, nou ook ondersoek gaan word,” het Bayat aan Die Burger gesê.
Volgens hom sal die saak waarskynlik na die hof of na die Kommissie vir Versoening, Bemiddeling en Arbitrasie (CCMA) verwys word.
Bayat was tot in 2007 die voorsitter van CapeNature. Hy is die medeskrywer van die boek A Guide to Managing Research.
Volgens Desai sal die drie personeellede so spoedig moontlik volgens dieselfde prosedure ondersoek word en die posisie van dekaan van die fakulteit besigheidstudie binnekort geadverteer word.
“Ons hoop om die jammerlike hoofstuk in die geskiedenis van KSUT so gou moontlik agter ons te sit.”
- Die Burger
