Kaapse seiljagvaarder vermis

2012-07-23 10:00

Kaapstad – Die polisie in die Seychelle ondersoek die verdwyning van 'n Kaapse seiljagvaarder wat tydens 'n stormagtige vaart vermis geraak het, het die Cape Times Maandag berig.

Volgens die koerant het Sean Terry (48) op 13 Mei vanaf die Maledive-eilande vertrek en het glo tydens ’n storm op see oorboord geval voordat die seiljag in Junie op 'n eiland naby die Seychelle aangekom het. 

Judith Middleton, 'n woordvoerder vir sy familie, sê Terry het saam met Stefan Pokorny gereis.

Pokorny is intussen deur die polisie ondervra. Die saak sal ook vandeesmaand in die hof aangehoor word.

Dit is nie bekend of Pokorny aangekla is nie.

Middleton het gesê Terry se seiljag het op 25 Junie op die eiland Coëtivy met slegs Pokorny aan boord aangekom.

"Terry is as vermis aangemeld nadat hy glo 'n paar dae vantevore oorboord geval het," het sy gesê.

Terry was 'n ervare seiljagvaarder en skipper wat besig was om die laaste skof van sy vaart om die wêreld op die seiljag Finnegan te voltooi.

Die familie het intussen 'n Facebook-blad geskep in 'n poging om meer inligting rondom Terry se verdwyning te kry.

– Volg Nuus24 op Twitter.
 

- SAPA