Kaapse pedofiel sit 15 jaar

2013-01-30 07:20

Kaapstad – Die veroordeelde pedofiel Johannes Kleinhans is Dinsdag in die Parow-streekhof tot 15 jaar tronkstraf gevonnis.

Kleinhans, 'n direkteur van verskeie maatskappye, is in November verlede jaar skuldig bevind op 95 aanklagte van die onwettige besit van kinderpornografie, seksuele aanranding en onsedelike aanranding.

Pornografiese materiaal is ook by sy huurhuis in Bellville gevind.

Landdros Amanda van Leeve het Kleinhans se gedrag as "afgryslik, vernederend en veragtelik" beskryf.

Die landdros het gesê sy het 'n morele verpligting om te verseker dat Kleinhans nooit weer die kans kry om ooit weer enige jong lewens te verwoes nie.

Kleinhans is terug na die Goodwood-gevangenis, waar hy die laaste 13 maande aangehou word omdat hy sy borgtogvoorwaardes verontagsaam het. Sy naam sal ook op die oortredersregister verskyn.

– Volg Nuus24 op Twitter