Kaapse owerhede help duisende ná vloede
2012-07-08 22:18
Kaapstad – Owerhede in Kaapstad moes die naweek honderde oproepe opvolg om inwoners te help wat deur oorstromings geraak is, het 'n woordvoerder Sondagaand gesê.
Rampbestuurspanne het warm maaltye, kospakkies, klere, komberse en plastiekbedekking verskaf aan 2 566 mense wat as gevolg van oorstromings sonder heenkome was, het Wilfred Solomons-Johannes, 'n woordvoerder, in 'n verklaring gesê.
Owerhede het tussen Vrydag- en Sondagaand 348 oproepe opgevolg waar paaie, eiendom en informele nedersettings aandag moes kry. Altesaam 321 van die probleme het reeds aandag geniet. Die oorblywende insidente sal Maandag hanteer word.
"Die stad het sedert Vrydag ook ingegryp in 839 gevalle waar dreine geblok was en rioolstelsels oorstroom het. Die sterk winde het ook talle bome regoor Kaapstad omgewaai en die stad se parke-afdeling moes op 38 insidente reageer waar bome verwyder moes word, en/of gesnoei moes word."
Die stad se elektrisiteitsdienste moes 1 545 oproepe opvolg.
Die rampbestuursentrum het ook vroeër Sondag 'n ontruimingsbevel uitgereik vir die River Club langs die Liesbeekrivier in Observatory, as gevolg van stygende watervlakke.
Solomons-Johannes het gesê die stygende watervlak het sowat 60 mense op die perseel in gevaar gestel. Hulle is uit die gebied ontruim.
Inwoners is gevra om uit die gebied te bly, en om die omgewing liefs te verlaat.
Veiligheidsbeamptes van die stad is in die gebied ontplooi om verkeer te beheer en die veiligheid van mense te verseker.
Die stad se rampbestuursentrum en ander departemente was teen Sondagaand steeds op 'n hoë gereedheidsgrondslag, het Solomons-Johannes gesê.
– Volg Nuus24 op Twitter.
- SAPA
