Kaapse leerder doodgesteek oor kosblik

2013-02-08 11:14

Kaapstad – 'n Tiener van Kaapstad sal binnekort in die hof verskyn nadat hy na bewering 'n medeleerder doodgesteek het, het die Daily Voice berig.

Aphelele Nogqala (14) is Dinsdag by die ingang van die Isilimela Senior Sekondêre Skool in Langa doodgesteek omdat hy nie sy kosblik wou gee nie.

Sy ma, Nomthetho (49), het gesê hy het gereeld oor boelies by sy skool gekla.

"Ek weet nie wie hom gesteek het of hoekom nie, maar ek bly dink aan die dag wat hy aan my gesê het daar is ander kinders wat probeer om hulle kos af te vat. Hy was een van die mense wat geweier het om sy kos te gee."

Sy het 'n beroep gedoen op die departement om metropolisiebeamptes by meer skole te ontplooi.

Kapt. Frederick van Wyk, polisiewoordvoerder, het aan die koerant gesê 'n 15-jarige seun is in verband met die moord in hegtenis geneem en sal binnekort in die hof verskyn.

– Volg Nuus24 op Twitter

- SAPA