Kaapse hotel op swartlys oor beweerde diefstalle
2010-08-30 22:14
Kaapstad – ‘n Kaapstadse vyfsterhotel is deur die Verenigde State se konsulaat op die swartlys geplaas ná bewerings oor talle diefstalle aan die lig gekom het.
Beamptes van die Verenigde State wat gaste by die Westin Grand was, het die bewerings van diefstalle oor dié hotel, wat langs die Kaapstadse Internasionale Konferensiesentrum (CTICC) is, gemaak.
Amerikaanse burgerlikes in Suid-Afrika is via ‘n e-pos oor die hotel gewaarsku.
Die konsulaat het ook op die ambassade van die Verenigde State se webtuiste gesê dat werknemers en kontrakteurs van die Amerikaanse regering aangeraai is om nie by die Westin Grand te bly nie.
Volgens die e-pos is die kennisgewing gemaak aangesien talle diefstalle by die hotel deur werknemers van die Amerikaanse regering aangemeld is.
Die e-pos sê geen van die diefstalle was gewelddadig nie.
Die werknemers van die Amerikaanse regering het glo die voorvalle van diefstal op 11 Augustus by die hotel aangemeld.
Die situasie word tans ondersoek.
Volgens Nathan Holt, woordvoerder vir die konsulaat, werk hulle tans met die Westin Grand om hierdie kwessie op te los.
Volgens hom is die e-pos aan die Amerikaanse gemeenskap in Suid-Afrika gestuur.
Volg Nuus24 op Twitter.
- SAPA