Kaapse bordeel 'dalk deel van sindikaat'
2011-09-12 21:03
Kaapstad – ‘n Chinese vrou wat na bewering aangehou het om haar bordeel-onderneming te bestuur terwyl sy op borgtog vry was, mag dalk ‘n lid van ‘n internasionale sindikaat wees, het die Goodwood-streekhof Maandag gehoor.
Sers. Alfons de Leeuw, ‘n georganiseerde misdaad-speurder, het getuig by die vrou se tweede borgtogaansoek voor landdros Kathy Page.
Die vrou se naam mag nie bekend gemaak word voor sy pleit op die aanklagte nie.
In die eerste geval, wat op die rol is in die Parow-streekhof, staan die vrou en ‘n jonger vrou tereg op 13 aanklagte, wat mensehandel vir seksuele doeleindes insluit.
Beide was vry op borgtog van R5 000, maar die polisie het ‘n tweede klopjag op ‘n huis in Marais-straat in Goodwood uitgevoer, waar die bordeel na bewering bestuur is.
De Leeuw het aan die hof gesê die ouer vrou sal nou tereg staan op bykomende aanklagte van mensehandel en die besit van dwelms.
De Leeuw het, toe hy deur Staatsadvokaat M Mazondwa ondervra is, gesê dit is moontlik dat aanklagte van afpersery en geldwassery ook bygevoeg kan word.
Die tweede klopjag is uitgevoer nadat ‘n polisiebeampte in Julie ‘n klag ontvang het oor onwettige aktiwiteite by die huis in Goodwood.
Die beampte en ‘n konstabel van die eenheid teen georganiseerde misdaad het drie jong Chinese vroue in verskillende slaapkamers van die huis gekry.
Al drie was masseuse in China en het geantwoord op ‘n internet-advertensie vir beskikbare poste by ‘n masseersalon in Kaapstad.
Toe hulle in Kaapstad aangekom het, is hulle na die huis in Goodwood geneem, waar hulle hul paspoorte aan die Chinese vroue moes oorhandig. Die vrou het gesê hulle sal as masseuse werk, maar sal ook bereid moet wees om seks met kliënte te hê.
Sy het aan hulle gesê hul reis van China af het haar R32 000 elk gekos en dat hulle sal moet werk totdat dié geld terugbetaal is.
Die drie vroue het die volgende dag as masseuse en prostitute begin werk. Hulle moes al die geld wat hulle gemaak het, direk aan die vrou betaal.
- Volg Nuus24 op Twitter
- SAPA