Kaapstad kry Khoisan-naam

2012-06-27 10:41

Kaapstad – Die Khoisan-gemeenskap het Kaapstad ‘n nuwe naam gegee, het die Cape Times Woensdag berig.

Die naam “//Hui !Gaeb”, die Khoisan vir “plek waar die wolke vergader”, sal binnekort op ‘n kennisgewingbord in die middestad verskyn.

Dié stap volg ná die dood van die tradisionele leier en geneesheer Oom Dawid Kruiper vroeër dié maand.

Tania Kleinhans, sekretaris-generaal van die Institute for the Restoration of Aborigines of SA, sê die naam is een waarmee mense van enige ras, groep of nasie kan identifiseer.

Sy het die kitskosgroep Nandos genader om die kennisgewingbord te borg.

Sy sê sy het Nandos gekies weens een van sy omstrede televisie-advertensies wat vroeër die maand vrygestel is.

Die advertensie begin met ‘n stem wat sê: “Jy weet wat is fout met Suid-Afrika? Dit is al julle buitelanders.”

Dit wys dan mense van verskeie kulture en rasse van oor die land wat skielik verdwyn en net ‘n rookwolkie wat oorbly.

‘n Khoisan-man is die enigste wat oorbly en hy sê dan hy gaan nêrens.

Volgens die berig sal die bord Donderdag opgerig word en ‘n vertaling sal bygevoeg word.

– Volg Nuus24 op Twitter

 

- SAPA