Kaap is vrot van die dwelms
2012-02-09 07:00
Kaapstad – Die polisie in die Wes-Kaap het die afgelope 22 maande op dwelms ter waarde van meer as R12 miljard beslag gelê.
’n Miljoen liter alkohol is ook afgevat.
Dié geld is 12 keer meer as die waarde van die onwettige goedere in die tabak-, klere- en tekstielbedryf waarop die Suid-Afrikaanse Inkomstediens (SAID) in die boekjaar 2010-’11 beslag gelê het.
Lt.genl. Arno Lamoer, Wes-Kaapse polisiehoof, het Woensdag aan die parlementêre portefeuljekomitee oor polisie gesê dwelms word daagliks in die provinsie gevind.
Dié suksesse is deels te danke aan ’n projek om passasiersbusse, taxi’s en koeriervoertuie by alle toegangsroetes tot die provinsie te deursoek.
Die projek is op 1 April 2010 op Beaufort-Wes begin. In een week is daar in passasiersbusse op dwelms ter waarde van R15 miljoen beslag gelê.
’n Busbestuurder is verlede week in hegtenis geneem en beslag is gelê op ’n passasiersbus nadat die polisie ’n groot besending van die dwelmmiddel khat gevind het. Die polisie kry goeie samewerking van busmaatskappye.
Busmaatskappye is nou verplig om toe te sien dat elke stuk bagasie met die passasier se naam gemerk is.
In nog ’n geval is ’n groot besending dagga in die Suid-Kaap gevind op ’n swaarvoertuig wat motors vervoer.
Dwelms is ’n groot oorsaak van misdaad in die Wes-Kaap, het Lamoer gesê. “Dit het verlede jaar aan die lig gekom dat die jongste dwelmverslaafde in die Wes-Kaap nege jaar oud is. Tik is nie die gewildste nie. Heroïen is baie meer verslawend as enige ander dwelmmiddel.”
Volgens hom het die Wes-Kaapse polisie agtergekom dat bendes nie meer op mekaar skiet nie. “Hulle steek mekaar nou omdat die vuurwapens al hoe minder word namate op onwettige wapens beslag gelê word. Ons het tans 11 000 vuurwapens waarop ons beslag gelê het en wat vernietig gaan word.”
Rooftogte by sakeondernemings het ná die Wêreldbeker-sokkertoernooi in 2010 die hoogte ingeskiet. “Altesaam 80% van dié rooftogte vind plaas by spaza- of huiswinkels. Slegs 33% van die slagoffers van rooftogte by sake-ondernemings is Suid-Afrikaners – die res is almal buitelanders.”
Volgens Lamoer bank dié winkeleienaars nie hul geld nie, maar hou hulle dit in hul winkels. Dié winkels doen ook dag en nag sake.
’n Groot groep Namibiërs is vroeër aangekeer ná ’n vlaag huisrooftogte in Claremont.
Die polisie het ook ’n operasie teen perlemoensmokkelary begin.
Volg Nuus24 op Twitter
- Die Burger