KZN-hospitale ly onder wasgoed-chaos

2012-09-14 20:41

Durban – Sibongiseni Dhlomo, die LUR vir gesondheid in KwaZulu-Natal, het erken dat sy departement wasgoeddienste by provinsiale hospitale afgeskeep het.

“In terme van instandhouding en wasgoeddienste was ons nie waar ons moes wees nie. Die geld is op ander plekke spandeer,” het Dhlomo gesê.

Dhlomo het by die Inkosi Albert Luthuli-hospitaal in Durban gepraat na berigte dat 'n tekort aan beddegoed by provinsiale hospitale 'n chaos veroorsaak het.

Die Mercury-koerant het Maandag berig dat provinsiale hospitale sukkel om skoon beddegoed te kry omdat masjiene by die departement se grootste wassery in Sea Cow Lake, Durban, nie in 'n werkende toestand is nie.

Die vier hoof-wasserye in KwaZulu-Natal is by die Prince Mshiyeni-gedenkhospitaal, Dundee-hospitaal, Albert Luthuli-hospitaal en Sea Cow Lake.

Dhlomo het gesê die wassery by die Prince Mshiyeni-hospitaal sal opgeknap word sodat hy aan alle hospitale wasserydienste kan verskaf.

“Intussentyd sal aan elke hospitaal masjiene verskaf word om te gebruik.”

Hy het bygevoeg dat daar vertragings kan wees, maar dat die department die hospitale sal bystaan.

– Volg Nuus24 op Twitter
 

- SAPA