‘Jy’t £1 miljoen gewen!’: SA vrou verloor R1,2 m.
2010-03-18 07:58
Vicus Bürger, Beeld
Frankfort. – ’n Jong vrou van dié dorp is met meer as ’n R1 miljoen ingeloop met die bekende 419-slenter.
Die 26-jarige vrou het in Desember ’n e-pos ontvang wat haar inlig dat sy ’n miljoen Britse pond in ’n oorsese kompetisie gewen het.
Sers. Philani Mvuna, polisiewoordvoerder, sê volgens die e-pos moes sy ’n voorlopige bedrag betaal voordat sy haar prysgeld kon kry.
Sy het op 18 Januarie duisende rande in ’n bankrekening betaal. Toe is vir haar gesê sy moet na Londen gaan om haar prys op te eis, maar weens werkverpligtinge kon sy nie.
Die swendelaars het haar ingelig dat sy ’n agent teen betaling moet aanstel om die geld namens haar op te eis.
Sy is ook selfoonnommers gegee van mense wat haar sou help om die prysgeld te kry. Hulle het almal op betaling aangedring vir “dienste” aan haar.
Toe die geld later in haar bankrekening gedeponeer moes word, het die swendelaars baie verskonings gehad.
Hulle het in ’n stadium vir haar gesê ’n kluis met die prysgeld is na Suid-Afrika gebring en sy moet nóg betaal om dit te laat oopmaak. Sy het weer betaal, maar steeds nie ’n sent van haar “prysgeld” gekry nie.
Mvuna sê tussen Januarie en Maart het die vrou 13 betalings van altesaam R1,2 miljoen gedoen.
Die vrou het gister gesê sy is nog in ’n “toestand” en wil nie nou kommentaar lewer nie.
- Beeld