'Junior' in Cele se plek
2011-10-25 09:06
Kaapstad – ’n Feitlik onbekende en “relatief junior” polisieman sal genl. Bheki Cele se skoene nou moet vol staan.
Van die polisie se topbestuurslede was Maandag laatmiddag uit die veld geslaan oor genl.maj. Nhlanhla Sibusiso Mkhwanazi (38) se aanstelling as waarnemende nasionale polisiehoof deur pres. Jacob Zuma.
“Ek weet nie wat om te sê nie. Ek weet nie wie hy is nie,” het ’n senior beampte by navraag gesê.
Genl.maj. Nonkululeko Mbatha, nasionale polisiewoordvoerder, het in ’n verklaring gesê Mkhwanazi is goed bekend in die polisie as “Lucky”. Hy het in 1993 by die polisie aangesluit en aanvanklik in openbare-orde-polisiëring gewerk.
Hy is later na die spesiale taakmag en sedert 2005 is hy die hoof daarvan. In dié hoedanigheid bestuur hy onder meer die lugvleuel, alle gespesialiseerde operasies, die taktiese reaksiespan, die nasionale intervensie-eenhede, mobiele operasies en oorgrens-operasies.
“Ek sien uit daarna om hierdie hele organisasie met energie te bestuur, natuurlik met die hulp van my kollegas en die hele bestuur van die Suid-Afrikaanse Polisiediens,” het Mkhwanazi in die verklaring gesê.
Dr. Johan Burger, senior navorser van die Instituut vir Sekerheidstudies, het gesê Mkhwanazi se aanstelling is onverklaarbaar, gegewe dat Zuma Cele se vier adjunkte oor die hoof gesien het. “Watter boodskap stuur dit uit deur iemand van ’n redelik junior vlak bó senior mense met jare se ondervinding aan te stel? Dit kan mos nie goed wees vir die orde en dissipline binne die polisie nie.”
Volgens Burger is Cele se skorsing “die laaste episode wat die polisie nodig het” nadat Jackie Selebi, voormalige polisiehoof, verlede jaar op aanklagte van korrupsie skuldig bevind is.
’n Raad van ondersoek onder leiding van oudregter Yvonne Mokgoro, wat in 2009 as regter van die konstitusionele hof uitgetree het, sal bewerings van wangedrag en die openbare beskermer (OB) se bevindings teen Cele ondersoek en ’n aanbeveling aan Zuma maak. Mokgoro sal bygestaan word deur advokate Terry Motau SC en Anthea Platt.
Mac Maharaj, Zuma se woordvoerder, het gister op ’n mediakonferensie by die Uniegebou gesê die ondersoek moet so vinnig moontlik afgehandel word.
Die raad kan aanbeveel dat Cele strafregtelik vervolg moet word indien bevind word hy het die Polisiewet of enige ander wet en regulasies oortree.
Cele is intussen met sy volle salaris en voordele geskors hangende die uitslag van die ondersoek. Sy jaarlikse pakket beloop minstens R1,5 miljoen.
Zuma het Cele op 29 Augustus in kennis gestel dat hy ’n raad van ondersoek gaan aanstel en hom gevra om in ’n voorlegging te motiveer hoekom hy nié geskors moet word nie.
Volg Nuus24 op Twitter
- Die Burger