Julius se tugsaak haak vas oor klaer
2010-05-04 09:04
Lizel Steenkamp, Beeld
Kaapstad – Julius Malema, die ANC se jeugleier, is wel in Luthuli-huis voor stok gekry.
Die tugverhoor kon egter volgens die jeugliga aanvanklik nie aan die gang kom nie omdat die nasionale tugkomitee onder die voorsitterskap van Derek Hanekom, adjunkminister van wetenskap en tegnologie, nie kon vasstel wie die klagte aanhangig gemaak het nie.
“Toe ek laas gehoor het, kon die tugkomitee nog nie bepaal van wie die klagte kom nie. Ons wag nou nog vir terugvoering. Hoe kan ’n verhoor aangaan in die afwesigheid van ’n klaer?” het Vuyiswa Tulelo, die jeugliga se sekretaris-generaal, gistermiddag laat gesê.
Sy het bevestig dat Malema vir sy tugverhoor opgedaag het.
Jackson Mthembu, die ANC se nasionale woordvoerder, het gisteraand in ’n verklaring gesê die tugkomitee kon die verhoor nie afhandel nie en sal volgende Dinsdag weer vergader.
Hy het voorts bevestig dat Mathews Phosa, die ANC se tesourier-generaal, Malema verteenwoordig.
Mthetmbu het vroeër die dag geweier om te sê of Malema skuld beken of ontken het.
Die klagte teen Malema hou glo daarmee verband dat hy die ANC en die regering in oneer gebring het.
Sou die nasionale tugkomitee Malema skuldig bevind, kan hy ingevolge die ANC se grondwet met ’n ligte raps op die vingers – ’n teregwysing – daarvan afkom.
Dit is een van die vier strawwe, waaronder ’n boete, skorsing of uitsetting uit die party, wat die tugkomitee kan uitdeel.
Die ANC se grondwet bepaal dat die tugkomitee sy besluit openbaar moet maak.
Dit bepaal ook dat verlof tot appèl aan die beskuldigde en diegene wat die klagte aanhangig gemaak het, toegestaan word.
Volg Nuus24 op Twitter vir al die jongste nuusberigte
- Beeld