Julius dieper in die sop
2011-12-20 08:54
Kaapstad – Die diepte van die politieke pekel waarin Julius Malema, geskorste leier van die ANC-jeugliga, hom bevind, kan toeneem ná sy stortkop-dansie die naweek in Polokwane.
Malema het Saterdag op die regerende party se provinsiale kongres ’n dansie uitgevoer waarin hy sy vingers soos ’n stortkop bo sy kop gehou het tydens die sing van ’n nuwe proteslied, “Die stortman gee ons opdraande”.
Pres. Jacob Zuma word al meer as vier jaar deur allerlei teenstanders wat hom as onnosel wil voorstel, gespot oor sy stelling in sy verkragtingsverhoor dat hy meen ’n deeglike stort kan oordrag van die MI-virus verhoed.
Alle aanduidings is dat klagtes oor die jongste streke ter ondermyning van Zuma tot nuwe klagtes teen Malema binne die ANC kan lei.
Themba Mthembu, KwaZulu-Natalse sekretaris van die SAKP, het gister gesê verdere tugstappe behoort teen Malema gedoen te word.
“Optrede soos dié is ongekend en behoort ons baie bang te maak. Ons behoort die staatshoof en die land te respekteer.”
Hoewel hy nie aan die ANC wil voorskryf wat om te doen nie, het Mthembu gesê die SAKP in die provinsie sal die saak met die ANC bespreek.
Hy sal egter baie verbaas wees as nuwe tugstappe nie teen Malema gedoen word nie.
Mbuyiseni Mathonsi, die SAKP se provinsiale tesourier, het gesê die bespotting wat nou van Zuma gemaak word, is nie dieselfde as die kritiek op oudpres. Thabo Mbeki voordat Zuma tot partyleier verkies is nie.
Die ander verskil is dat ’n voorval waarin ’n T-hemp met Mbeki se gesig daarop in ’n betoging aan die brand gesteek is, deur al die lede van die regerende alliansie veroordeel is, het Mathonsi gesê.
By navraag het Jackson Mthembu, nasionale ANC-woordvoerder, gesê klagtes oor enige gebeure by die Limpopo-kongres kan eers na afloop van die kongres ingedien word.
Intussen het dit teen gisteraand gelyk of Malema, wie se appèl teen sy skorsing as ANC-lid hangende is, tot die provinsiale uitvoerende komitee van die ANC in Limpopo verkies sou word. Die uitslag was teen druktyd gisteraand nog nie bekend nie.
Die sowat 1 200 afgevaardigdes het gister in geslote sessies vergader om mosies en beleid te bespreek.
Die grootste groep van die afgevaardigdes is Zuma nie goedgesind nie, en dit lyk of hulle hul meerderheid wil gebruik om mosies en beleidsvoorstelle te aanvaar wat die staatshoof en ANC-leier in die verleentheid sal stel.
Die konferensie se resolusies en beleidsvoorstelle sal vanmiddag aangekondig word.
Dit sal na verwagting ’n resolusie ten gunste van nasionalisering (soos voorgestel deur die jeugliga) en ’n resolusie teen ingryping van die nasionale regering in provinsiale bestuur insluit.
Volgens Sapa het mnr. Soviet Lekganyane, die ANC se provinsiale sekretaris in Limpopo, gistermiddag ontken dat ’n mosie aanvaar sou word dat die ANC Malema nie moet skors nie.
– Verslagspan: Jan-Jan Joubert, Dries Liebenberg en Piet Rampedi
- Die Burger