Juju-modereeks bekend gestel
2012-01-26 19:56
Johannesburg – ‘n Modeontwerper van Pretoria se Mabopane-township het ‘n reeks klere bekend gestel wat deur die geskorste leier van die ANC-Jeugliga, Julius Malema, geïnspireer is.
Die keppies, T-hemde en frokkies met handelsmerke op vertoon ‘n helderkleurige mond, wat geïnspireer is deur sy toesprake, het die 27-jarige ontwerper, Obakeng Ramabodu, gesê.
“Ek het nog nie iemand anders ontmoet na wie 80 persent van mense luister wanneer hy praat nie.”
Dit is die uitgesproke Malema se dryfkrag om sy doel ondanks teenstand te bereik wat Ramabodu geïnspireer het om deur te druk met sy idee om die Juju-handelsmerk te ontwikkel. Juju is Malema se bynaam.
“Hy druk altyd vir dinge,” het hy gesê.
Die kledingstukke verkoop goed, met 300 T-hemde wat vinnig verkoop is nadat dit beskikbaar geword het.
Die ontwerper mik vir die mark van 10- tot 36 jaar oud en sal ‘n Juju Babe-reeks vir vroue, ‘n Juju Boy-reeks vir jong mans en Juju Kids by die reeks insluit.
Ondanks Ramabodu se entoesiasme vir Suid-Afrikaanse politiek het hy weens vervaardigingskoste na China gekyk om die eerste reeks te vervaardig.
“Dit is ‘n Suid-Afrikaanse idee. Die Chinese sou nie hierdie ding kon maak as dit nie in my kop was nie.”
Hy hoop nou groot verkopers soos die Edcon Groep en Woolworths sal daarin belangstel om die klere te verkoop.
Die provinsiale bekendstelling van die reeks sal plaasvind in Malema se tuisprovinsie, Limpopo.
- Volg Nuus24 op Twitter
- SAPA