Jub Jub 'wil nie tronk toe gaan'

2012-12-05 12:46

Johannesburg – Die veroordeelde moordenaar Molemo "Jub Jub" Maarohanye se lewe agter tralies is "nie goed nie", het die Protea-landdroshof gehoor.

“Dis nie goed nie; ek weet nie wat om anders te sê nie...” het die kwaito-sanger gesê nadat sy regsverteenwoordiger, Rudi Krause, hom gevra het hoe sy lewe in die tronk is.

“Ek wil nie tronk toe gaan nie.”

Maarohanye het tydens sy vonnisverrigtinge afgekyk voordat hy ‘n beëdigde verklaring voorgelees het.

“As ek die geleentheid kry, wil ek in die openbaar om verskoning vra vir enige skade wat ek onopsetlik veroorsaak het.”

Maarohanye en sy medebeskuldigde, Themba Tshabalala, is daaraan skuldig bevind dat hulle op 8 Maart 2010 deur ‘n groep skoolkinders geploeg het terwyl hulle resies in Mdlalose-rylaan in Soweto gejaag het.

Vier kinders het in die ongeluk gesterf en twee ander het ernstige beserings opgedoen.

Hy het bygevoeg dat hy ‘n trustfonds vir die skoolkinders se families sal skep indien hy nie tronkstraf opgelê word nie.

Jub Jub se vonnis sal na verwagting binnekort bekendgemaak word.

Volg Nuus24 op Twitter