Jub Jub-verhoor uitgestel
2011-10-13 18:59
Johannesburg – Die moordverhoor van Molemo “Jub Jub” Maarohanye en Themba Tshabalala is Donderdag in die Protea-landdroshof uitgestel.
Die verhoor is tot 30 November uitgestel vir die staat om ‘n getuie te roep wat sal getuig oor die uitslae van urinemonsters wat van die beskuldigdes geneem is.
Die staat het twee forensiese analiste geroep, wat bevestig het dat die monsters ontleed is. Hulle weet egter nie wat die uitslag is nie, aangesien die saak nie aan hulle toegewys is nie.
Raymond Ndzo en Pheletso Makoro het aan die hof gesê hulle werk slegs met die masjiene wat gebruik word om die monsters te ontleed.
‘n Getuie wat nie Donderdag by die hof was nie, is die een wat die uitslag ken en aan wie die saak toegewys is, het hulle gesê.
Maarohanye en Tshabalala word aangekla van moord, poging tot moord en die bestuur onder die invloed van alkohol en dwelms.
Hulle het in Maart 2010 in ‘n groep skoolkinders ingeploeg terwyl hulle na bewering met ‘n straatresies besig was in Soweto. Vier van die skoolkinders is dood en twee is beseer.
- Volg Nuus24 op Twitter
- SAPA