Jub Jub-verhoor duur voort
2011-10-11 09:12
Johannesburg. – Die verhoor van Molemo "Jub Jub" Maarohanye en Themba Tshabalala word Dinsdag in die Protea-landdroshof voortgesit.
Die kwaitosanger en Tshabalala het teen meer as 100km/h resies gejaag, het ’n kenner Maandag getuig.
Jub Jub (Molemo Maarohanye) en Tshabalala staan tereg op onder meer vier aanklagte van moord en twee van poging tot moord nadat hulle glo in Maart verlede jaar met hul Mini Coopers tydens ’n straatresies in ’n groep skoolseuns ingeploeg het.
Andile Mtombeni (19), Mlungisi Cwayi (17), Phomelelo Masemelo (16) en Prince Mahube (17) is dood.
Renier Balt, ’n ongeluk-rekonstruksiekenner, het getuig daar was ses skaafmerke op die padoppervlak by die ongelukstoneel, waarvan drie elk deur die twee mini’s gemaak is. Uit dié merke kon hy aflei hoe vinnig hulle gery het.
Maarohanye se silwergrys Mini het teen 112km/h beweeg en Tshabalala se bloue teen 109km/h.
Volgens hom het die motors nié teen mekaar gebots nie, maar gerol omdat hulle oorstuur is.
Adv. Ike Motloung, Maarohanye se regsverteenwoordiger, het vroeër die dag aangevoer die ondersoek was “onbehoorlik en onregverdig”.
Volgens hom het die polisie urinemonsters tien dae lank in ’n sluitkas gebêre voordat dit na ’n laboratorium gestuur is om getoets te word.
Motloung het in Augustus gesê Maarohanye het geldelike probleme en dat hy hom waarskynlik nie verder sal kan verdedig nie. Dit was nie Maandag duidelik waarom hy van plan verander het nie.
– Volg Nuus24 op Twitter
- SAPA