Jub Jub se vonnisoplegging uitgestel

2012-11-30 12:03

Johannesburg – Die musikant Molemo "Jub Jub" Maarohanye en sy medebeskuldigde, Themba Tshabalala, se vonnisoplegging is tot volgende week uitgestel.

Maarohanye se regsverteenwoordiger, Rudi Krause, het aansoek om uitstel gedoen. Hy het gesê hy is onlangs aangestel en het nie genoeg tyd gehad om voor te berei nie.

Landdros Brian Nemavhidi het die uitstel goedgekeur.

“Die saak is tot 5 Desember [Woensdag] uitgestel,” het hy gesê.

Nemavhidi het verlede maand albei mans op vier aanklagte van moord, twee van poging tot moord en roekelose en nalatige bestuur terwyl hulle onder die invloed van drank en dwelms was, skuldig bevind.

Jub Jub en Tshabalala is daarvan aangekla dat hulle deur ‘n groep skoolkinders geploeg het terwyl hulle resies in Mdlalose-rylaan in Soweto gejaag het. Dié straat is sedertdien Jub Jub-laan gedoop.

Vier kinders het in die ongeluk gesterf en twee ander het ernstige beserings opgedoen.

Volg Nuus24 op Twitter

- SAPA