Jub Jub-saak: gru-besonderhede bekend gemaak
2011-07-11 16:50
Johannesburg – Die verhoor van die musikant Jub Jub, oftewel Molemo Maarohanye, en sy medebeskuldigde is in die Protea-landdroshof tot 14 Julie uitgestel.
Raymond Mathenjwa, staatsaanklaer, het gevra dat die saak tot Donderdag uitgestel word omdat hy eers dan weer beskikbaar is.
Maarohanye en Tshabalala het na bewering op 8 Maart verlede jaar in 'n groep skoolkinders ingeploeg.
Vier kinders is dood in die ongeluk en twee ander het ernstige beserings, waaronder breinskade, opgedoen.
Maarohanya en Tshabalala staan tereg op aanklagte van moord, poging tot moord en bestuur onder die invloed van dwelms en alkohol.
Al die oorledenes het kop- en nekbeserings opgedoen, het dr. James Blair Mwesigwa, forensiese patoloog, aan die hof gesê.
Mwesigwa het op 9 Maart 2010 die nadoodse ondersoeke op die lyke uitgevoer.
Hy het gesê al die lyke het bloed in al drie ventrikels van die brein gehad, wat 'n aanduiding was dat hulle erge beserings aan die kop opgedoen het.
Die eerste lyk wat hy ondersoek het, se skedel was aan die linkerkant vergruis en bloed het by die neus en ore uitgeloop.
Mwesigwa het gesê die ondersoek van die tweede lyk het getoon dat die seun nie op slag dood is nie.
"Hy het gesnak en gekreun voor hy dood is."
Die seun se skedel het ook van sy ruggraat verskuif. Hy het gesê dieselfde ding gebeur wanneer iemand gehang word.
Die derde lyk was gedeeltelik onthoof. Mwesigwa het gesê indien die impak harder was, sou die kind heeltemal onthoof gewees het. Slegs die vel het die kop aan die lyf verbind.
Mwesigwa, wat deur Ike Motloung, Maarohanye se regsverteenwoordiger, ondervra is, het prentjies geteken om die oorledenes se beserings aan die hof te illustreer.
– Volg Nuus24 op Twitter
- SAPA