Jub Jub-saak: 'Getuie weerspreek haarself'
2011-05-23 12:29
Johannesburg – Die metropolisiebeampte wat in die moordverhoor van Molema "Jub-Jub" Maarohanye en Themba Tshabalala getuig, weerspreek haarself, het Ike Motloung, regsverteenwoordiger vir die verdediging, Maandag gesê.
"Jy weerspreek jouself... In die vorms wat jy het, is daar plek om die tyd in te vul wat jy begin het?" het Motloung aan konst. Velemina Mojela in die Protea-landdroshof gevra.
"Nee," het Mojela geantwoord.
Motloung het haar onder kruisverhoor geneem oor haar getuienis in terme van die tydlyn waarin 'n alkohol- en bloedtoets op Maarohanye en Tshabalala gedoen is. Die getuienis was om te bewys dat die twee mans positief getoets het vir dwelms en alkohol.
Motloung het Mojela, wat twee strate van die ongelukstoneel woon en tuis was ten tyde van die ongeluk, gevra of sy gehoor het toe die ongeluk gebeur het.
"Ek het niks behalwe sirenes van ons polisiemotors gehoor toe ek reggemaak het om werk toe te gaan nie," het Mojela gesê.
"Ek het van die ongeluk gehoor toe ek by die werk kom."
Raymond Mathenjwa, staatsaanklaer, het beswaar aangeteken teen Motloung se ondervraging omdat dit volgens hom nie relevant is nie.
"Die getuie getuig oor die toets vir alkohol en dwelms. Sy het nog nooit getuig oor die ongelukstoneel nie. Ek sukkel om relevansie in die kruisondervraging te kry. Sy het nooit die toneel genoem nie," het hy gesê.
Mojale het aan die hof verduidelik hoe sy te werke gegaan het om die alkohol- en bloedtoets te doen.
Maarohanye en Tshabalala het na bewering op 8 Maart verlede jaar in 'n groep skoolkinders geploeg.
Vier kinders is dood in die ongeluk en twee ander het ernstige beserings, waaronder breinskade, opgedoen.
Maarohanya en Tshabalala staan tereg op aanklagte van moord, poging tot moord en bestuur onder die invloed van dwelms en alkohol.
Volg Nuus24 op Twitter
- SAPA