Jub Jub-saak: Beampte verloor 'kritieke' bewyse
2011-06-22 15:14
Johannesburg – 'n Beampte wat teenwoordig was toe die bloedmonsters van Molemo “Jub Jub” Maarohanye en sy medebeskuldigde Themba Tshabalala getrek is, het 'n boek met die monsters se reeksnommers verloor, het die Protea-landdroshof Woensdag gehoor.
Mbulelo Mhaka, metropolisiebeampte, het aan die hof gesê hy het die boek verloor nadat hy in September verlede jaar in 'n ongeluk was en eers in Maart vanjaar teruggekeer het werk toe.
Hy het eers op 15 Junie 'n verklaring afgelê.
Ike Motloung, Maarohanye se regsverteenwoordiger, het Mhaka gevra hoekom hy nie 'n verklaring afgelê het toe die ongeluk plaasgevind het nie.
Mhaka het gesê hy is nooit gevra om 'n verklaring af te lê nie.
Motloung het Mhaka ook gevra hoekom hy nie die reeksnommers in sy verklaring genoem het nie.
Mhaka het gesê sy Engels is nie vlot nie en dat hy 'n fout gemaak het.
Motloung het toe gesê die ondersoekbeampte het hom dalk van die reeksnommers herinner toe hy die verklaring afgelê het. Mhaka het gesê hy het alles self onthou en niemand het hom met die verklaring gehelp nie.
Maarohanye en Tshabalala het na bewering op 8 Maart verlede jaar in 'n groep skoolkinders geploeg.
Vier kinders is dood in die ongeluk en twee ander het ernstige beserings, waaronder breinskade, opgedoen.
Maarohanya en Tshabalala staan tereg op aanklagte van moord, poging tot moord en bestuur onder die invloed van dwelms en alkohol.
Die verhoor duur voort.
Volg Nuus24 op Twitter
- City Press