Jub Jub-ongeluk: Geen spoedtekens was op die pad
2011-10-13 15:05
Johannesburg – Geen spoedtekens was op die pad waar Molemo "Jub Jub" Maarohanye en Themba Tshabalala in 'n groep skoolkinders geploeg het nie, het die Protea-landdroshof Donderdag gehoor.
Die ongeluk-rekonstruksiekenner Renier Balt, wat vir 'n vierde dag in die getuiebank is, het aan die hof gesê die pad was in 'n goeie toestand, maar geen spoedtekens was sigbaar nie.
Tshabalala se regsverteenwoordiger, Mlungiseleli Soviti, het Donderdag gesê Balt het in sy verslag genoem alle padtekens was sigbaar.
"Wat het jy bedoel met alle padtekens was sigbaar?" het Soviti gevra.
"Ek het na die versperringslyne verwys," het Balt geantwoord.
Balt het getuig dat die twee Mini Coopers waarin die twee mans gery het, vinnig in die rigting van die aankomende verkeer gery het toe die ongeluk in Maart verlede jaar plaasvind. Hulle het na bewering resies gejaag.
Maarohanye en Tshabalala het na bewering op 8 Maart verlede jaar in 'n groep skoolkinders geploeg.
Vier kinders is dood in die ongeluk en twee ander het ernstige beserings, waaronder breinskade, opgedoen.
Maarohanye en Tshabalala staan tereg op aanklagte van moord, poging tot moord en bestuur onder die invloed van dwelms en alkohol.
Die verhoor duur voort.
– Volg Nuus24 op Twitter
- SAPA