Jub Jub-medebeskuldigde 'berouvol'
2012-10-16 16:01
Johannesburg – Die musikant Molemo "Jub Jub" Maarohanye se medebeskuldigde, Themba Tshabalala, het gesê hy is berouvol nadat hy skuldig bevind is op vier aanklagte van moord en twee van poging tot moord.
"Ek voel gebroke, omdat ek dalk nie die geleentheid gaan hê om 'n toekoms te hê en na my familie kan omsien nie," het hy Dinsdag in die Protea-landdroshof gesê.
Liesel van Jaarsveld, staatsaanklaer wat borgtog teenstaan, het aan Tshabalala gesê sy borgtogaansoek gaan net oor homself en dat hy nie die families van die skoolkinders genoem het nie.
"Het jy enige berou?" het sy gevra.
"Ek het. Nie een van die kinders het verdien om te sterf nie," het Tshabalala geantwoord.
Die staat het 'n aansoek ingedien om Maarohanye en Tshabalala in aanhouding te hou nadat hulle skuldig bevind is op aanklagte van moord en poging tot moord.
"Ná die skuldigbevinding, sal die getuie na verwagting Edelagbare toespreek oor die vonnisoplegging," het Raymond Mathenjwa, staatsaanklaer, gesê.
"Ons kan dit nie vandag doen nie. Ons vra dat die saak tot 30 November verdaag vir vonnisoplegging. Die beskuldigdes is skuldig bevind aan 'n skedule 6-oortreding en ons versoek dat hulle in aanhouding bly.
Maarohanye en Tshabalala is skuldig bevind op vier aanklagte van moord en twee van poging tot moord.
"Die staat kon bo redelike twyfel bewys dat die beskuldigdes skuldig is aan vier aanklagte van moord en twee van poging tot moord," het landdros Brian Nemavhidi gesê.
Nemavhidi het hulle ook skuldig bevind op aanklag dat hulle op 'n openbare pad resies gejaag het.
Maarohanye en Tshabalala het op 8 Maart 2010 resies gejaag in Protea-Noord toe hulle in 'n groep skoolkinders geploeg het.
Prince Mohube, Mlungisi Cwayi, Andile Mthombeni, en Phomello Masemola is dood.
Frank Mlambo en Fumani Mushwana is ernstig beseer.
Maarohanye het aangedui dat hy om borgtog gaan aansoek doen, maar sy regsverteenwoordiging het Dinsdag geëindig, maar hy het aansoek gedoen vir 'n ander prokureur om hom te verteenwoordig.
Vonnisoplegging sal op 30 November plaasvind.
– Volg Nuus24 op Twitter
- SAPA
