Jub Jub kry 20 jaar vir moord

2012-12-05 18:03

Kaapstad – Die Protea-landdroshof het die kwaito-sanger Molemo "Jub Jub" Maarohanye en sy medebeskuldigde, Themba Tshabalala, Woensdag tot 20 jaar tronkstraf gevonnis.

"Julle het die ongeluk nie vooraf beplan nie, dit het gebeur...die hof kan dus nie lewenslange tronkstraf oplê nie," het landdros Brian Nemavhidi in sy vonnisoplegging gesê.

Maarohanye en Tshabalala is ook tot vier jaar tronkstraf gevonnis vir poging tot moord.

Vir die gebruik van dwelms, dronkbestuur en deelname aan 'n straatren op 'n openbare pad het hulle 'n jaar vir elke aanklag ontvang. Dié vonnisse is gelyklopend.

Landdros Nemavhidi het vroeër albei beskuldigdes op vier aanklagte van moord, twee van poging tot moord en roekelose en nalatige bestuur terwyl hulle onder die invloed van drank en dwelms was, skuldig bevind.

Die musikant en sy medebeskuldigde is daarvan aangekla dat hulle op 8 Maart 2010 deur ‘n groep skoolkinders geploeg het terwyl hulle resies in Mdlalose-rylaan in Soweto gejaag het. Dié straat is sedertdien Jub Jub-laan gedoop.

Vier kinders het in die ongeluk gesterf en twee ander het permanente breinskade opgedoen.

Familielede van die skoolkinders was emsioneel tydens die vonnisoplegging en een ma het saggies gehuil.

Maarohanye en Tshabalala het met geboë hoofde na die vonnisoplegging geluister.

Volg Nuus24 op Twitter

- Nuus24