Jub Jub het nie geld vir petrol
2011-10-15 16:51
Johannesburg – Die hiphop-ster Molemo “Jub Jub” Maarohanye, wat verlede jaar na bewering in 'n groep skoolkinders geploeg het, skuld glo geld aan verskeie petrolstasies nadat hy hulle oorreed het om sy tenk vol te maak sonder dat hy hoef te betaal.
Volgens Manoj Rama, eienaar van ‘n petrolstasie, is sy besigheid een van baie vir wie Maarohanye om die bos gelei het.
Rama sê hy het aan sy personeellede gesê om op die uitkyk te wees vir Maarohanye.
“Dié bekendes dink hulle kan wegkom met enigiets.”
Volgens Rama word motoriste nie toegelaat om hul petroltenke vol te maak sonder om eers te betaal nie.
“Gewoonlik wanneer hulle nie betaal nie neem ons ‘n waardevolle besitting wat gelykstaande is aan die bedrag wat hulle skuld. Hulle kry dit wel terug sodra die geld betaal is.”
‘n Kelner wat by ‘n restaurant werk wat Maaronhanye gereeld besoek het, beweer die ster het ‘n R50 by hom geleen en nog nie weer teruggegee nie.
Daar is onlangs bekendgemaak dat Maarohanye nie sy prokureur Ike Motloung kan bekostig nie.
Alhoewel Motloung steeds vir Maarohanye verteenwoordig is dit nie bekend waar hy die geld kry om sy regskostes te betaal nie.
Maarohanye en Themba Tshabalala staan tereg op onder meer vier aanklagte van moord en twee van poging tot moord nadat hulle glo in Maart verlede jaar met hul Mini Coopers tydens ’n straatresies in ’n groep skoolseuns ingeploeg het.
Andile Mtombeni (19), Mlungisi Cwayi (17), Phomelelo Masemelo (16) en Prince Mahube (17) is dood.
Die verhoor is Donderdag tot 30 November uitgestel.
– Kliek hier om die volledige storie te lees.
– Volg Nuus24 op Twitter.