Jub Jub: Slagoffers se families nie tevrede

2012-12-06 11:17

Johannesburg – Familielede van die skoolkinders wat deur Molemo "Jub Jub" Maarohanye in ‘n ongeluk omgery is, is ontsteld dat die kwaito-sanger net tot 25 jaar tronkstraf gevonnis is.

“Vyf-en-twintig jaar is nie genoeg nie,” het een van die seuns se tannies buite die landdroshof in Protea, Soweto, gesê.

“Hoe gee jy 25 jaar vir die lewe van vier kinders? Hoe? Dit is nie genoeg nie. Ander mense kry 15 jaar wanneer hulle een kind dood maak.”

Maarohanye en Themba Tshabalala is elkeen 20 jaar gevangenisstraf vir moord opgelê. Hulle is tot vier jaar tronkstraf vir poging tot moord gevonnis, terwyl hulle elkeen nog een jaar agter tralies sal deurbring vir resies jaag en die bestuur onder die invloed van dwelms.

Landdros Brian Nemavhidi het tydens die vonnisoplegging gesê die mans kan nie lewenslange tronkstraf opgelê word nie, omdat hulle nie die ongeluk vooraf beplan het nie.

Die musikant en sy medebeskuldigde is daarvan aangekla dat hulle op 8 Maart 2010 deur ‘n groep skoolkinders geploeg het terwyl hulle resies in Mdlalose-rylaan in Soweto gejaag het. Dié straat is sedertdien Jub Jub-laan gedoop.

Vier kinders het in die ongeluk gesterf en twee ander het permanente breinskade opgedoen.

Volg Nuus24 op Twitter  

- SAPA