Joost trek, Amor bly
2010-05-23 11:00
Johannesburg - “I don’t care! Ek gaan nie meer probeer om almal op aarde gelukkig te
hou nie. In die verlede was dit my downfall.”
So het Joost van
der Westhuizen geantwoord op die vraag of hy nie die skinderstories oor
sy huwelik wil opklaar nie. Sy vrou, die sangeres Amor Vittone, het
Joost verlede Donderdagaand die deur gewys. Hy bly nou by vriende.
Anders
as wat Engelse koerante gister berig het, het Amor en hul twee kinders
nié uit die gesin se spoghuis op die Dainfern-landgoed in Johannesburg
getrek nie.
Amor se ma en bestuurder, me. Delyse Vittone, het
gister gesê haar dogter woon steeds in die huis.
“Ek is in die
bevoorregte posisie om ’n vrou soos Amor langs my te hê,” het Joost
verlede Sondag nog in die NG kerk in Weltevredenpark in Johannesburg
gesê.
Die paartjie het verlede Saterdag in verskillende motors by
die Papfees in Grootvlei naby Vereeniging opgedaag. Hulle het nie ’n
woord met mekaar gepraat nie.
Amor het net per SMS laat weet sy
waardeer al die ondersteuning. Sedert die Joost-seksvideo-skandaal vroeg
verlede jaar losgebars het, het dit sleg met die egpaar gegaan. Joost
het sy werk by SuperSport verloor en sy borge het begin kop uittrek.
Hy
het R700 000 by die private ondersoeker Mike Bolhuis geleen. Van sy
biografie is glo sowat 20 000 eksemplare verkoop. Van der Westhuizen het
aan Rapport gesê hy gaan nie bevestig óf ontken dat hy en sy vrou nou
nie meer saam bly nie.
“Daar is baie mense wat vir ons bid en ons
bystaan,” was al wat hy wou sê. In die paartjie se binnekring word gesê
Amor se ouers is “verlig” oor die skeiding.
- Rapport