Joost se skoonouers stook glo onmin
2009-09-27 13:46
Gavin Prins
Amor Vittone se ouers probeer haar huwelik met die oud-Springbok Joost van der Westhuizen verongeluk, sê die private speurder mnr. Mike Bolhuis.
Hy het mev. Delyse en mnr. Dario Vittone gister prontuit daarvan beskuldig dat hulle in Joost en Amor se huwelik inmeng, berig Rapport.
“As Joost-hulle, soos wat nou beweer word, op die drumpel is van ’n egskeiding, is dit die werk van Amor se ouers.”
Bolhuis se reaksie kom ná berigte die afgelope week dat Amor en Joost verlede naweek voor haar ouers rusie gehad het.
Dis onbekend waaroor hulle gestry het, maar Joost het glo daarna by die huis uitgestorm.
Mnr. Vittone het volgens ’n berig in Beeld aan sy skoonseun gesê om sy vuurwapen, wat hy aan hom gedra het, by die huis te los. Dís waarskynlik gedoen uit vrees dat die voormalige Bok-kaptein iets onverantwoordeliks sou aanvang.
Mev. Vittone het gister ontken daar is enige onmin tussen haar en haar skoonseun.
Maar ’n goed ingeligte bron het gisteroggend gesê dinge is beslis nie pluis tussen Joost en sy skoonouers nie.
Bolhuis het dit beaam. Hy sê die Vittones probeer al sedert die seksvideo-skandaal om hul dogter te oortuig om van Joost te skei.
Mev. Vittone het gister gesê: “Dis alles aantygings wat gemaak word. Niemand weet wat in ons familie aangaan nie.
“As ek hardlywig is, het dit niks met die publiek uit te waai nie. Net so met Amor en Joost ook.”
Mev. Vittone, wat haar dogter se bestuurder is, het gesê sy bring die naweek saam met Joost en Amor deur.
Sy het wal gegooi teen “valse stories” wat die afgelope week die ronde gedoen het dat die paartjie op skei staan en geldelike probleme het.
“Daar lê baie stories rond oor die kinders. Ek gaan nie sê wat waar is en wat nié waar is nie.”
Bolhuis hou vol dat hy alles in sy vermoë gaan doen om te keer dat die Vittones in sy vriend se huwelik inmeng.
“Sodra Joost sy boek klaar geskryf het, gaan ek ook openbarings maak,” waarsku hy.
“Ek is self deur Dario genader kort nadat Joost se videostories uitgekom het. Dit was ’n interessante gesprek tussen my en Dario wat ek gaan bekendmaak.
“Maar Joost moet éérs sy boek klaarkry.”
Oor Joost se gesondheid is Bolhuis baie besorg.
“Hy was in die hospitaal, maar hy is nou fine, hoewel hy deur ’n moeilike tyd gaan.
“Hy is kwaad vir almal. Hy weet nie wie om te vertrou nie.”
Bolhuis het ook bevestig dat hy Joost ’n paar maande gelede R700 000 geleen het.
“Joost was ’n bietjie in die knyp en ek het hom gehelp. Punt.
“Niemand wou meer met hom sake doen ná al die negatiewe publisiteit die laaste tyd nie.”
- Rapport