Joost se 'siekte' steeds een groot raaisel
2011-06-07 09:14
Johannesburg – Die “fatale” siekte wat Joost van der Westhuizen na bewering het, bly steeds ’n raaisel.
Weke nadat Van der Westhuizen, gewese Springbok-kaptein en -skrumskakel, skielik hospitaal toe is en luidens aanvanklike verklarings met die gevreesde motorneuronsiekte (MNS) gediagnoseer is, weet die neuroloog wat daarna sy behandeling oorgeneem het, steeds nie wat presies hom makeer nie.
Bridget van Oerle, Van der Westhuizen se woordvoerder, het Maandag gesê die uitslae van ’n reeks toetse wat op Van der Westhuizen gedoen is nadat hy aanvanklik meegedeel is dat hy nie lank het om te lewe nie, is steeds nie beskikbaar nie.
“Gevolglik kon daar ook nog nie met enige behandeling vir Joost begin word nie.”
Neuroloë sal eers oor behandeling kan besluit sodra bepaal is of hy inderdaad MNS het en, indien wel, watter vorm daarvan.
Sy vervreemde vrou, Amor Vittone, het in die laaste tyd in verskeie emosionele onderhoude gesê sy is verward omdat Van der Westhuizen haar nie op die hoogte bring van sy toestand nie. Uit Maandag se opmerkings van Van Oerle blyk dit egter dat Van der Westhuizen self nie weet wat hom makeer nie.
Volg Nuus24 op Twitter
- Die Burger