Joost se boek binne 24 uur uitverkoop
2009-11-04 06:33
Philip de Bruin
Die eerste opgawe van Joost van der Westhuizen se boek Joost: Man in the mirror, het Maandag binne 24 uur uitverkoop.
Kim Taylor van Random House Struik-uitgewers wat die boek uitgee, het gesê “duisende” kopieë was Maandagoggend in boekwinkels. “Teen Maandagaand was geen enkele kopie meer oor nie.”
Die Afrikaanse weergawe, Joost: Spieëlbeeld, was gister op die rakke, maar Taylor kon teen druktyd nog nie sê presies hoeveel kopieë hiervan verkoop is nie.
“Ek kan wel sê selfs Steve Hofmeyr se outobiografie, Mense van my asem, het nie so goed verkoop nie.
“Joost se boek is trouens nou een van die twee topverkopers onder die biografieë wat ons uitgegee het. Die enigste ander een wat so vinnig verkoop het, was dié van Jake White (gewese Springbok-afrigter), Black and white.”
* Amelia Griesel, president van die Suid-Afrikaanse Professionele Poligraaf-assosiasie (Sappa), het gister haar afkeur uitgespreek oor die hantering van die leuenverklikkertoets wat Van der Westhuizen oor die seksvideo afgelê het.
Van der Westhuizen het die afgelope naweek gesê die uitslag in sy guns “was duidelik vals omdat ek gelieg het”. Mike Bolhuis, sy private ondersoeker, het gesê die toets was “gerig”.
“Die gebeurtenis met Joost en sy poligraaftoets dra absoluut nie die goedkeuring van Sappa en sy lede weg nie. Dit druis in teen die professionele en etiese gedrag wat deur Sappa-lede gehandhaaf word.
- Beeld