Joost se ander geheim
2009-11-04 07:21
Kaapstad - Joost van der Westhuizen het sy vrou, Amor Vittone, glo ook met die oud-Bokatleet Charmaine Weavers (Gale) verkul.
Dit het gister aan die lig gekom nadat Van der Westhuizen Sondag nog gesê het sy kontak met die jong vrou in die berugte seksvideo was “die eerste en enigste keer” wat hy ontrou aan Amor was, en hy ontken hy het ’n verhouding met Weavers gehad.
Weavers (46) het gister bevestig sy het ’n verhouding met Van der Westhuizen gehad. Sy het gesê sy is bly Van der Westhuizen het nou in die openbaar erken hy is die man in die Joost-seksvideo.
“Dit is net jammer sy belydenis was so selektief. Pleks dat hy eerder maar oor alles gebieg het.
“Dit is vandag die eerste keer dat ek in die openbaar onder my naam oor my verhouding met Joost praat. Ek meen die dinge moet uitkom sodat die boek van die verlede toegemaak kan word.”
Weavers het haar verbintenis met die voormalige Springbok-kaptein vroeër vanjaar in ’n onderhoud met Huisgenoot onthul sonder dat haar identiteit toe bekend gemaak is.
Sy het destyds gesê sy en Joost het onder meer seks gehad terwyl Vittone swanger was.
Weavers het gister gesê haar verhouding met Van der Westhuizen het begin terwyl hy en sy eerste vrou, Marlene, nog getroud was. Hy en Marlene is in 2001 geskei en hy het kort daarna met Vittone getrou.
Toe Die Burger Van der Westhuizen gister nader oor Weavers se bewering, het hy gesê: “Daar was baie sondes en ek het baie verkeerde dinge gedoen. My versoek om vergifnis in my boek strek wyer as net die video; dit sluit my algemene verlede in. Van nou af wil ek net die reguit pad stap en dinge reg doen. Charmaine Gale, Mike Bolhuis (Van der Westhuizen se private ondersoeker) en enigiemand anders kan maar openbaar maak wat hulle wil. Ek bely my sondes, ek vra om verskoning, ek vra om vergifnis.”
Vittone het gister in trane in ’n onderhoud op Jacaranda 94.2 gesê haar hart is “uitgeruk”.
Sy het gesê sy het haar man “elke dag” gevra of dit hy in die video was.
- Die Burger