Joost praat weer rugby op kassie
2011-09-25 07:01
Johannesburg - Joost van der Westhuizen praat weer rugby op TV, al het motorneuronsiekte (MNS) sy spraak aangetas.
Joost het die afgelope week in ’n onderhoud op Jacaranda 94.2 gesê dit word vir hom moeilik om te praat sodra hy stres ervaar.
“Toe die Bokke teen Wallis gespeel het, kon ek nie ’n woord uitkry nie.”
Die oud-Bok-kaptein moes op sy mede-aanbieders, die rugbylegendes Jeremy Guscott en Scott Gibbs, staatmaak om die gesprekke aan die gang te hou.
“Eers teen halftyd kon ek weer praat. Voordat ek op TV gaan, gaan lê ek eers rustig op my bed en word kalm. Dan kan ek maklik praat.”
Hy was die afgelope week twee dae lank in Suid-Afrika om twee redes: ’n mediese ondersoek by dr. Jody Pearl, sy dokter, en om sy twee kinders, Jordan (7) en Kylie (5), te sien. Hy sê sy kinders weet steeds nie dat hy ’n dodelike spiersiekte het nie. “Al wat hulle weet is dat Dadda siek is.”
Hy is weer terug Dubai toe.
Joost werk vir OSN (Orbit Showtime Network) TV. Die uitsaaier bedien die hele Noord-Afrika en die ooste van Europa en saai uit in ’n rits tale, waaronder Engels.
Die Britse TV-man Jim Rosenthal is die ankeraanbieder en Joost, Guscott en Gibbs is gasaanbieders.
– Volg Nuus24 op Twitter
- Rapport